Rennblautir rótarýfélagar rótuðu niður 70 trjáplöntum

Það þurfti ekki að taka með vatn til að vökva trjáplönturnar 70 sem settar voru niður í skógræktarsvæði klúbbsins ofan Hvaleyrarvatns í dag. Eftir ómunatíð sólar og hita, miskunnuðu veðurguðirnir sig yfir klúbbfélaga og helltu ótæpilegu magni af rigningu yfir plönturnar en samkvæmt gamalli íslenskr ... Það þurfti ekki að taka með vatn til að vökva trjáplönturnar 70 sem settar voru niður í skógræktarsvæði klúbbsins ofan Hvaleyrarvatns í dag. Eftir ómunatíð sólar og hita, miskunnuðu veðurguðirnir sig yfir klúbbfélaga og helltu ótæpilegu magni af rigningu yfir plönturnar en samkvæmt gamalli íslenskri hefð kom rigningin lárétt úr suðaustri. Rótarýfélagar, makar og ungir hjálparkokkar voru misbúnir fyrir svona veður eftir sólstingi síðustu daga. Það var rösklega tekið á við gróðursetningu, mokaðar voru holur í grýtt holtið, og hrossaskít var bætt í áður en stálpuðum trjáplöntum var komið fyrir og þjappað vel með. Skítnum hafði verið mokað í poka og skjóður og fólksbílar klúbbfélaga nýttir til að flytja skítinn sem og trjáplönturnar. Það var ekki að ástæðulausu að vel var tekið á því heitur Skátalundur beið þar sem boðið var upp á pylsur (og pulsur) og fleira góðgæti. Rótarýfélagarnir skúruðu gólfin með blautum sokkunum og flestir voru rennblautir en ótrúlega ánægðir með eftirminnilegan dag. Næsta verk er að skipuleggja svæðið, ákvarða legu gönguslóða og athuga hvort einhvers staðar sé heppilegt að búa til fallegan framtíðarlund. Frábær dagur og þakklæti til allra sem mættu.